عشان انت مصري لازم تعاني
وتفقد كرامتك بكل المعاني
وتحرق ف دمك . سنين مش ثواني ..
واوعي تصدق كلام الاغاني
بتاع الحضاره وكاني وماني
ده كله هجايص . مايدخل وداني .
عشان انت مصري . العذاب بيناديك
بتبدأ ف يومك . حاجات بترازيك
ف نومك ف قومك تعكنن عليك
تضيقك ولسه العماص فى عينيك
مفيش ميه تشطف صابونه ف ايديك
وجسمك ملزق و ريحتك عاديك
ف تلبس وتنزل وفيك اللي فيك .
ورايح لشغلك . هتحتاج مواصله
ادي المترو واقف وكهربته فاصله
وفي الميكروباص خناقه و حاصله
اوتوبيس فرامله عايزالها واصله
وتوك توك ده تايه ومحتاج ل بوصله .
بتوصل ل شغلك بدم اتحرق
ف زحمه و كتمه و حر و عرق
رئيسك سايبلك كومة ورق
ده غير دمغة ضايعه وملف اتسرق
وفي كام مواطن عاملك قلق
بيشكي تقوله روح اندعق
وعركه و هوجه وشاي اندلق
ومخك خلاص من الصداع انفلق .
هترجع لبيتك ده لوكان فى بيت
هتوصل هتندم ياريتك ما جيت
مراتك بتصرخ خلاص استويت
عيالك بتطلب هات كيت وكيت
تزعق تهاتي ياناس اتهريت
ولا حد سمعك مهما هاتيت .
عشان انت مصري و ده للأسف
فلازم تقسي تعيش تتقرف
وكل الأساسي ف حياتك ترف
فتنسي الكرامه و تنسي الشرف
و تسرق و تنصب أو تنحرف
ودمعك بيجري و جرحك نزف
مش انت مصري ؟! جتك القرف .
تعليقات
إرسال تعليق